Şaredarîya Amedî ya Şaristanê Girdî çarçewaya tatbîqanê şaredarîya zafziwanî de Merkezê Vengdayîşî yê ALO 153î de dest bi dayîşê xizmetê zazakî kerd.

Tirkî û kurmanckî ra dima pê nê xizmetî yeno waştene ke hemwelatî waştiş, pêşnîyaz û gaziyanê xo bi ziwanê xo yê dayîke hîna rehet îfade bikerê.

Berpirsyara Merkezê Piştîdayîşî yê ALO 153î Ahwelat Turhalli, îfade kerd ke tatbîq goreyê waştişanê hemwelatîyan ame destpêkerdene û vat ke xizmetê kurmanckî ra dima seba zazakî zî zaf ame waştene.

Yeno plankerdene ke eke waştiş zêde bibo hûmara personelanê ke bi zazakî xizmet bidê, bêro zêdekerdene; çarçewaya xebatanê şaredarîya zafziwanî de yeno waştene ke prosesê ameyoxî de xizmetê erebkî û îngilîzkî zî bêro dayene.