Şaredarîya Amedî ya Şaristanê Girdî, bi amancê ke çimeyanê awe bipawo û waranê keskan awan bikero ke hetê şertanê îklîmî ra xurt ê, tatbîqatê peyzajo ziwa yê çatrayîrê pêresayîşê Bulwarê Selahattîn Eyyubî û Bulwarê Firatî temam kerd.

Serekîya Daîreya Park û Baxçeyan, projeya ke goreyê şertanê îklîmî yê germ û ziwayan ê şaristanî ame bicaardiş, tede tewirê nebatan ke awe kêmî şuxulnenê û goreyê îklîmî yê, weçînayî.

Çatrayîrî de seba pawitiş û dîzaynê zemînî 2 hezar û 600 metre kulavê geotekstîlî û hezar û 200 metre cîyakerdoxê zirçî ameyî bikarardiş, 74 ton kerraya domînoya sipîye û 85 ton curufê ponzayî yo sûr ame rokerdiş. Warê peyzajî de hezar û 370 gulî, 770 taflanê goldî, 750 abelya, 90 mazîya pîramîdî, 90 gula bastone û 10 selvîya kewe ameyî ronayîş. Destê peyênî do bi destpêkerdişê demserra zirçronayîşî bêro eştiş.

Ekîbanê Serekîya Daîre, Taxa Azîzîye ya qezaya Yenîşehîrî de refujo mîyanên ê Cadeyê TOKÎ yê 1. ser o zî dest bi xebatanê serûberkerdişê peyzajî kerd. Warî de ke muameleyê zemîn û pirkerdişê herre dewam kenê, demêko kilm de do goreyê prensîbanê peyzajo ziwa dar û lemî bêrê ronayîş.