Serokê Daîreya Karûbarên Tenduristiyê Vahap Saçaklidir, Dekanê Fakulteya Beyteriyê ya Zanîngeha Dîcleyê Prof. Dr. Aydin Ketanî ûnûnera HAYTAPê Sevgi Emekçiler, der barê îdiayên ku li Navenda Hewandin û Rehabîlîtekirina Heywanan îşkence li heywanan hatiye kirin de daxuyaniyek da û got, divê ji bo heywanên kuçeyan bikaribin li warkozên xwe bijîn xebateke hevbeş bêt meşandin.

Navenda Mafên Heywanan a Baroya Amedê, HAYTAP û akademîsyenên Fakulteya Beyteriyê a Zanîngeha Dîcleyê, li ser îdiayên der barê kuştina heywanên kuçeyan de li Navenda Hewandin û Rehabîlîtekirina Heywanan daxuyaniyeke hevbeş da. Berî daxuyaniyê, alîkarê sekreterê giştî Raşit Yalçin û Serokê Daîreya Karûbarên Tenduristiyê Vahap Saçaklidir, der barê navendê de agahî dan û destnîşan kirin ku ev navend 12 sal berê hatiye avakirin, li navendê 400 se û 60 pisîk têne ragirtin, demeke nêzik ew ê goristaneke heywanan jî çêkin û bi berfirehî der barê prensîbên navendê de agahî dan.

Di daxuyaniyê de, îdiayên kuştina heywanan hatin redkirin û hate bibîrxistin ku lêpirsîn dewam dike. Her weha di daxuyaniyê de der barê kargêriya navendê de agahîyên berfireh hatin dayîn û hate gotin ku rojê du danan, li navendê êm û xwarinê didin kûçik û pisîkan. Hate bibîrxistin ku xebata wan bo nûkirina vê navendê heye û got ku ew ê di vî warî de bi hemû saziyên civaka sîvîl ên têkildar re kar bimeşînin. Di daxuyaniyê de hate diyarkirin ku gava bêne cem hev dikarin hemû pirsgirêkên heyî çareser bikin û hate aşkerekirin ku ev navend malovaniyê ji se û pisîkên seqet û birîndar re dike û wan dihewîne û derman dike.

Di dewama daxuyaniyê de kêmasiyên navendê hatin bibîrxistin û hate gotin, divê xebat bi şaredariyan re bi hevkarî bête meşandin. Ji bo ev navend bo heywanan bibe stargeheke êmin û pêbawer divê xebat bi hev re bêne kirin û bo saxî û silametiya heywanan divê zend û bend bêne şidandin.