Şaredarîya Amedî ya Bajarê Girdî seba personelanê cinîyan ke şaredarî de xebitîyenê, semînerê cinsîyetê komelkî da.

Serekîya Daîreya Xizmetanê Cinî û Keyeyan, perwerdeyê "Cinsîyetê Komelkî" ke seba personelanê şaredarîye dest pêkerdbî, bi cinîyanê îdarekaran ke Serekê Daîre, Mudir, Şef û Berpirsîyarê Yewîneyan ê, dewam kerd.

Perwerdeyo ke Salona Konferansî ya Ali Emîrî ya Şaredarîya Bajarê Girdî de ame organîzekerdene, Sereka Daîreya Xizmetanê Cinî û Keyeyan Ozden Gurbuz Sumer da.

'Beşdarîya seypêyîye hêz dana komelî'

Gurbuz Sumer dîyar kerd ke cinsîyetê komelkî yew konsept o ke rolê ke komel dano cinî û camêrdan, berpirsîyarîyê înan, senî komel ferdî fehm keno û çi înan ra paweno, munaqeşe keno. Gurbuz Sumer va ke seypêyîya cinsîyetê komelkî îfade kena ke seba xebitnayîşê îmkanan û resayîşê xizmetan seba cinsîyetê kesî ferq nêro kerdiş û dîyar kerd ke cinî û camêrdî seypê yê û wayîrê eynî heqan ê.

Gurbuz Sumer îşaret kerd ke cinsîyet nêeşkeno seba heqanê bingeyînan sey perwerde, xebate û weşîye bibo sebebê cîyakerdiş û va ke beşdarîya seypêyîye û tesîrê cinî û camêrdan do hêz bido cuya komelî.