DÎSKÎ, Erxenî de seba hewceyîya binawanî Taxa Meqemdaxî de 2 xebata xeta kanalîzasyonî û awa şimitişî daye destpêkerdene.

Mudirîya Pêroyî ya DÎSKÎ ya Şaredarîya Amedî ya Şaristanê Girdî, Erxenî de seba ke hewceyîya binawanî ya awanîyanê ke bi lezabez zêde benê bêro temînkerdene, Taxa Meqemdaxî de 2 hezar û 800 metre dergîye xebata xeta kanalîzasyonî û awa şimitişî daye destpêkerdene.

Çarçewaya projeyî de ke hedef o yo ke peynîya teşrîna verêne de bêro temamkerdene, hezar û 500 metre xeta kanalîzasyonî û hezar û 300 metre xeta awa şimitişî bêro ronayene.

Bi nê xebatan cayanê ciwîyayîşî yê neweyan, serranê dergan dima binawanîyêka biweşîye, ewle û domdare do bêra temînkerdene.