Hemşaredara Amedî ya Şaristanê Girdî Serra Bucak dîyar kerd ke seba ke qanûno ke meclîsî rê ameyo erşawitene, bêro apeyantene, ê do pawitoxanê heqanê heywanan reyde bêrê têhet û heywanan rê wayîr bivejîyê.

Hemşaredara Amedî ya Şaristanê Girdî Serra Bucak û Dogan Hatun beşdarê îzahatê Komela Ekolojî bîy ke Parka Rojava de seba bedilîyayîşê qanûnê pawitişê heywanan ameybî organîzekerdene. Îzahato ke hemşaredarê qezayan, parlementerî û temsîlkarê rêxistinanê sivîlan beşdar bîy, amey dîyarkerdene ke heywanê ke kuçeyan ra azad gêrenê, do bêrê arêdayene û miqatxaneyan de bêrê hepiskerdene. Ame waştene ke wa no qanûn apey biancîyo.

Hemsereke Bucak: Ma cuya her gandarî pawenê

Îzahatî de hemşaredara ma Bucak qisey kerd û dîyar kerd ke ê do cuya her gandarî bipawê û wina va: “Ma do destekê xo bidê ke şert û mercê înan bibê hîna baş. Ma do hem xoza hem zî ekolojîya xo bipawê. Heywanî teberê ney de nîyê. Ma do pawitoxanê heqan reyde bêrê têhet û biwazê ke no qanûn apey biancîyo. Berpirsyarîya şaredarîyan zaf a. Ma do heqê heme heywanan ê werî bipawê. Ma hemverê heme zîhnîyetanê kuştoxan de yê. Mekişe, bide ciwîyayîş. Heywanî bêwayîr nîyê.”