Hemşaredarê Şaredarîya Amedî ya Şaristanê Girdî Serra Bucak û Dogan Hatun, çarçewaya têkilîyanê xo yê Fransa de, senatoranê Partîya Komunîste ya Fransa û Grûba Xebate ya Kurdan a Parlamanoyê Fransa reyde ameyî têhet û bal ante tahrîbatan ser o ke tatbîqê qeyûman viraşto.

Hemşaredarî, bi Endama Meclîsê DBB’yî Emîne Akin û Hemşaredara DBB’yî ya Verêne Gultan Kişanak reyde, verê senatoranê Partîya Komunîste ya Fransa Michelle Greaume û Pascal Savoldellî reyde awanîya Senato de kombîyayîş kerd. Kombîyayîşî de averşîyayîşê nikayînî yê Tirkîya, tesîrê prosesî yê rayberîyanê herêmkîyan ser o, xurtkerdişê hemkarîye û projeyê hemparî ameyî qiseykerdene.

Hemşaredare Bucak: Demokrasîya herêmkî ameya kiştiş

Hemşaredarî, dima Parlamantoyê Fransa de Serekê Grûba Xebate ya Kurdan Thomas Portes û endamanê komîsyonî Danielle Simonet û Marie Pochon reyde ameyî têhet. Hemşaredare Bucak îfade kerd ke tatbîqê qeyûman demokrasîya herêmkî kişeno û xizmetanê şaristanî de tahrîbatê cîdî viraştî. Bucak va ke şaredarîyan de 8 serran de waranê binawanî, res, polîtîkayanê komelkî, cinî, ziwan û kulturî de tu sermîyangozarî nêkerda. Bucak sewbîna îfade kerd ke qeyûman şaredarîyê binê barê deynanê girdan de verdayo û wexto ke rayberîyê herêmkî newe ra ameyî girewtene, kasayan de kêmîyê cîdî est bîyî.

'Îradeyê şarî ame teberverdayene'

Hemşaredare Bucak va ke bi tayînkerdişê qeyûman ê serra 2016î de beşdarîya demokratîke, komelê sivîlan û îradeyê şarî ame teberverdayene û no "neheqîyêka girde" û "sucê şaristanî" yo. Bucak îfade kerd ke ê her çiqas teda de bibê zî xebatanê dîplomasîya herêmkî û piştîpêdayîşî yê şaredarîyanê Ewropa reyde dewam kenê.

'Hemkarî do îmkananê neweyan biviraza'

Hemşaredare Bucak va ke Şaredarîya Amedî ya Şaristanê Girdî do Şaredarîya Rennesî reyde protokolê Şaristananê Wayûbirayîye îmza bikerê û na hemkarî do hem xizmetanê şaristanî de hem zî warê dîplomasîya şarî de îmkananê neweyan biviraza.

'Ma wazenê têkilîyê dîplomatîkî xurt bibê'

Hemşaredarê ma Hatunî zî îfade kerd ke ê hêvî kenê têkilîyê dîplomatîkî yê Fransa reyde waranê kultur, huner, sîyasî û teknîkî de hîna xurt bibê. Hatunî ard vîrardene ke têkilîyê Kurdan û Fransa yê bi serran o biqewet ê û ê hêvî kenê ke no hîna xurt bibo.