Hemşaredaranê Şaredarîya Amedî ya Şaristanê Girdî Serra Bucak û Dogan Hatunî çarçewaya têkilîyanê xo yê şaristanê Rennesî yê Fransa de, zîyaretê yewînanê Şaredarîya Rennesî kerd.

Zîyaretan de tetbîqê resî û tecrubeyê şaredarîya zafkulturî ameyî etudkerdene.

Departmanê Astengdaran û Resî ra derheqê tetbîqanê ke şaristanî de ameyî bicaardene de agahî ameyî girewtene.

Hemşaredaranê ma ke zîyaretê Departmanê Ziwan û Kulturî kerd, xebatê ke seba awanbîyayîşê zafkulturî yê Rennesî yenê kerdene, etud kerdî û tetbîqê şaredarîya zafziwanî yê Şaredarîya Amedî ya Şaristanê Girdî bi hîrayî pare kerdî.

Hemşaredaranê Amedî yê Şarsitanê Girdî, derheqê prosesê vurnayîşê Hepisxaneyê Jacques-Cartierî de ke serranê 1903-2010î de sey hepisxane ame şuxulnayene û nika bi beşdarîya şarî vurîyaya bî merkezê kultur û hemwelatîye, agahî girewtî.