Hevşaredara Bajarê Mezin a Amedê Serra Bucak, ji ber salvegera qetilkirina rojnamevan-nivîskar Mûsa Anter, tevlî merasîma bîranînê bû.

Ji bo rojnamevan û nivîskar Mûsa Anter ê ku di 20’ê Îlona 1992’an de li Amedê hatibû qetilkirin, bernameya bîranînê hat lidarxistin. Di bîranînê de ku di pêşengiya Komeleya Rojnamevanan a Dîcle Firatê (DFG) de li kolana 442'an a Taxa Cumhuriyetê ya Seyrantepeyê ku Anter lê hatibû qetilkirin, pêk hat, Hevşaredara Bajarê Mezin Serra Bucak, malbata Anter, rojnamevan, nûnerên partiyên siyasî û rêxistinên sivîl ên civakî amade bûn.

Piştî axaftinên rojnamevan û malbata Anter, girseyê li ber deriyê kolanê kom bû û bi wêneyê Mûsa Anter û dirûşma “Çapemeniya Azad nayê bêdengkirin” heta cihê ku lê hatibû qetilkirin meşiyan. Piştî meşê, li cihê ku Mûsa Anter hatibû qetilkirin, qerenfîl hatin danîn.