Hevşaredara Şaredariya Bajarê Mezin a Amedê Serra Bucak, maça Tîma Futbolê ya Jinan a Amedsporê û Hakkarîgucû Spor, ku li tribûnan edalet ji bo Rojîn Kabaiş dihat xwestin, temaşe kir.

Tîma Futbolê ya Jinan a Amedsporê, di hefteya 6emîn a Lîga Super a Futbolê ya Jinan de, li Stadyûma Çîm a Hejmar 1 a Şîlbeyê, derkete hemberî Hakkarîgucû Spor. Li tribûna qada lîstikê, ji bo xwendekara Zanîngeha Yuzuncu Yilê Rojîn Kabaiş, ya ku di 27ê Îlona 2024an de ji wargehê derketibû û di 15ê Cotmehê de cenazeyê wê hatibû dîtin, daxwaza edaletê hat kirin.

Hevşaredara Şaredariya Bajarê Mezin a Amedê Serra Bucak, Hevşaredara Şaredariya Yenîşehîrê Safiye Akdag, dayika Rojîn Kabaiş Aygul Kabaiş, xwişka wê Elîf Kabaiş, endamên Komîsyona Ciwan û Sporê ya Meclîsa Şaredariya Bajarê Mezin û gelek jinan li maçê temaşe kirin. Li tribûnan pankartên bi nivîsa “Bi Hev Re Ji Bo Rojînê Edalet” û “Ji bo Rojînê bibin deng” hatin hilgirtin, û Hevşaredar Serra Bucak, digel dayik û xwişka Rojîn, maç ji tribûnê şopand.

Di dirêjahiya maçê de, dirûşmên "Edalet ji bo Rojînê" gelek caran ji tribûnan bilind bûn.

Maç bi serkeftina Tîma Futbolê ya Jinan a Amedsporê bi encama 2-0 bi dawî bû.