Hevşaredarên Bajarê Mezin ê Amedê Serra Bucak û Dogan Hatun ku bi xwediyên keştiyan re li Gola Bendava Dîcle ya navçeya Gêlê hatin cem hev, diyar kirin ku keştiyên sotemeniya fosîl avê qirêj dikin û gotin, "Divê em ava vexwarinê ya 2 mîlyon mirovî paqij bihêlin."

Hevşaredarên Bajarê Mezin ê Amedê Serra Bucak û Dogan Hatun çûn navçeya Gêlê û keştiyên di Gola Bendava Dîcleyê de dixebitin kontrol kirin. Tevî Hevşaredaran endamên meclîsa şaredariyê jî amade bûn. Hevşaredaran bi xebatkarên keştiyan re hevdîtin kirin û daxwazên wan guhdar kirin û ji bo paqijiya gol û derdora wê hişyarî dan.

Hevşaredar: Mazota fosîl gola bendavê qirêj dike

Hevşaredaran diyar kirin ku keştiyên sotemeniya fosîl gola bendavê qirêj dikin û destnîşan kirin ku divê ava vexwarinê ya 2 milyon welatiyên bajêr paqij bihêlin. Hevşaredaran diyar kirin ku divê keştî ji sotemeniya fosîlê derbasî enerjiya nûjen bibin.

'Em ê hin tedbîran bigirin'

Hevşaredaran destnîşan kir ku ji paqijiya gola bendavê bigire heta ewlekariya wê ji her tiştî berpirsyar in û destnîşan kirin ku xwediyên keştiyan ji bo geştiyaran baldar bin û destnîşan kirin ku ew ê hin tedbîran bigirin.

Hevşaredaran serdana esnafên li qeraxa gola bendavê jî kirin û xwestin ji bo maseyên ku li qeraxê golê hatine danîn, rêgez bên çêkirin.