Şaredarîya Amedî ya Şaristanê Girdî seba ke hewza xemilnayîşî ya Meydanê Şêx Seîdî yê Berê Koyî ke vîrê şaristanî de cayêko muhîm o, newe ra fonksîyonel bikera û biresna asayîşê ci yê verênî, xebatêka peyzajî ya hîraye kena.

Çarçewaya xebatan de ke hetê Serekîya Daîreya Park û Baxçeyan ra dest pêkerd, seba vernîgirewtişê pedeşîyayîşê awe yê hewze ke demêko derg bêmiqate mendo, sîstemê îzolasyonî ame newekerdene.

Badê temambîyayîşê xebatanê bînawanî, derûdorê hewze do bêro şînkerdene. Bi temambîyayîşê xebatan yeno amanckerdene ke hewza tarîxî ya xemilnayîşî biresa heybet û pîrozîya xo ya verêne û biba dingêko muhîm ê cuya şaristanî.