Hemserekê Şaredarîya Bajarê Girdî yê Amedî Dr.Adnan Selçûk Mizrakli,kombîyayîşê konseyê bajarî de qisey kerd û vat:"Ganî no sezgeh henî geş bibo, eke enerjîya şima qem bibê no semed ma çîyêko weş nîyo.Ganî ma her roj semedê geşbîyayîşê konseyê bajarî bixebitîyîme."

Kombîyayîşê Rêveberîya Lijne ya Konseyê Bajarî bi serekîya Hemserekê Şaredarîya Bajarê Girdî yê Amedî Dr.Adnan Selçûk Mizrakliyî ,Salona Resepsîyonî ya Cuya Muşterek a Sumerparqe de serrast bî û kombîyayîşê rê ,Hemserek Mizrakli,Hemsereka Sûrî Fîlîz Buluttekîn,Hemserekê Peyasî Davut Kesen,serekê Odeya Bazirganî û Sanayî yê Mehmet Kaya, Serekê Baroyî Cîhan Aydin,temsîlkaranê rêveberîya sezgehî beşdar bîyî.Kombîyayîş de aktîvîsta Komela Ekolojîye ya Amedî seba Sekreterîya Pêroyî yê Konseyê Bajarî ame weçînitene.

Hemserek Mizrakli kombîyayîş de qiseykerdişek viraşt û vat:"Ma Tirkîye de sifteyê kombîyayîşê Konseyê Bajarî viraşt.Seba ke no gure raye xo de bi rihetî şire ganî dewamê ci est bo.Ez bawera ke embazanê ma do sey Meclîsê Mişewre ya Berz bixebitîye."

Mîlyonek û 700 hezar kontroklerê ma estê

Hemserek Mizrakli vîr vîst ke kombîyayîşanê konseyê bajarî yo verê de beşdarî qem bîyo û qiseykerdişa xo wîna domna:"Ganî no sezgeh henî geş bibo, eke enerjîya şima qem bibê no semed ma çîyêko weş nîyo.Ganî ma her roj semedê geşbîyayîşê şima bixebitîyîme.Ma vanê ke mîlyonek û 700 hezar kontrolkerê ma estê.Çimkî ma zanenê ke heme şarê ma kontrolkerê ma yo.Şar hem ma pesn kenî hem zî rixne kenî.O semed xebitnayîşêko wînasî semedê demokrasîyê bajarî zî giring o.Çimkî ma tîya de temsîlkarîya heme sezgeh û kesan kenê û ez bawera ke no konsey rayê heme çîyan a bikero.

Ganî hişmendî û ruhê cografyayê bibo

Hemserek Mizrakli badê wîna vat:"Ma tim û tim vanê ke ganî ma bajarê xo rê wayîr vejîme,bajarê xo biseveknîme,hevîyê sibarojê bajarî xo hêz bikerîme.La bi taybetî ganî ma cugehê xo de ruhê hişmendî û cografyayî awan bikerîme.Ganî tîya de ruhê wayîrtîyê bibo ke histenîkîyê ma zî geş bibo."

Qalîkerdişa Hemserek Mizrakliyî ra dima aktîvîsta Komela Ekolojîye ya Amedî Guner Yalçin seba Sekreterîya pêroyî yê Konseyê Bajarî bi yewîya rayan ame weçînitene.