Hemşaredarê Amedî yê Şaristanê Girdî Serra Bucak û Dogan Hatunî hemşaredaranê qezayan reyde Kayapinar, Baglar, Yenîşehîr û Sûrî de xebatê parkan û projeyan cayê înan de kontrol kerdî.

Hemşaredarî verê şîyî baxçeyê nebatanê dermanî û aromatîkan ê 14 hezar metrekareyî yê Kayapinarî. Nê baxçeyî de 15 tewirê nebatan do bêrê ramitene û cinîyan rê do bibo çimeyê qezencî.

Dima Baglar de Cadeyê Emekî û Bulwarê Medîneyî de xebatê peyzajê huşkî, Cadeyê Ehmed Kayayî de 2 projeyê parkan kontrol kerdî.

Yenîşehîrî de Taxa Fabrîka de 2 parkê ke yenê viraştene, Sûrî de zî 3 parkê ke reyna yenê newekerdene, kontrol kerdî.

Hemşaredaran xebatkaran reyde sohbet kerd, derheqê projeyan de melûmatê hîrayî girewtî û yewîneyê eleqedaran reyde fikrê xo pare kerdî.