Şaredarîya Amedî ya Şaristanê Girdî, çarçewaya Kursanê Perwerdeyê Hunerî û Karî (DÎSMEK) de bi 15 kursan sey muzîk, tekstîl, resim, berbertî û karê kerrayan, bi pêroyî 274 kesan rê perwerde dana.

Serekîya Daîreya Xizmetanê Komelkî, seba ke qabîlîyetê karî yê şarê xo zêde bikero û hetkarîya berhemardişî bikero, xebatanê xo dewam kena. Merkezanê DÎSMEKê Goletlî Park û Sumerparkî de kursî akerdî û perwerdeyan dest pê kerd. Hetê mamosteyanê pisporan ra, 274 kesî yê mabênê 16-65 serrîyan rê; kursanê muzîkî, berbertî, miqatekerdişê çermî, karê kerrayan, tekstîl, dîzaynê modayî, karê destî, viraştişê kaykilanê darênan, resim, amadekarîya unîversîte, saz û viraştişê kaykilanê keçeyan de perwerdeyî yenê dayene. Perwerdeyî ke her rojanê hewteyî de dewam kenê, do 3 aşman ra dima temam bibê.

Hetkarîya îstîhadamî

Şefîya Mûsayîşê Pêroyê Emrî Serap Çaprazîfade kerd ke amancê înan o yo ke cinî û ciwanî nê qadan ra xizmet bivînê. Çapraz va: "Nê kursî hem qabîlîyetê komelkî yê kesan zêde kenê hem zî hetkarîya îstîhdamî kenê."

Karê ke yenê xovîrakerdene, gandar benê

Çapraz îfade kerd ke atolyeyanê karê kerrayan û selikan hesîran de, ê karê ke yenê xovîrakerdene newe ra yenê gandarkerdene.

Kursîyere Esmanur Tanla va: "Ma seba ke huneranê ke yenê xovîrkerdene aver berê û xurt bikê, yenê tîya. Ez fikirîyena ke seba averbedişî cayê tewr rind tîya yo."

Kursîyera modelîstî ya Cemîle Çetinkaya zî va: "Tena sinifanê modelîstîye de nê, tîya de ez beşdarê xeylê kursan bîya, ma xeylê çîyê neweyî zêde kerdî."