Li navçeya Peyasê xebatên peyzajê li Cadeya Dorşîn dest pê kirin, Hevserokê Şaredariya Bajarê Mezin a Amedê Dr. Selçûk Mizrakli, ev xebat seh kirin û der barê çawanîya wan de agahî ji rayedaran wergirtin.

Serokatîya Daîreya Park Baxçe û Şîngehan a Şaredariya Bajarê Mezin a Amedê, li navçeya Peyasê xebatên peyzaja cadeya Dorşîn dan destpêkirin. Hevşaredar Mizrakli çû cihê xebatê û der barê xebatan de agahî ji rayedaran wergirtin. Mizrakli xwest ku li bulvara ser vê cadeyê peykereke jinane bête daçikandin û der barê nebatan de jî bîr û raya xwe bi rayedaran re parve kir. Karê axguhastin û binesaziya bulvarê bi encam bûye û çaverê ye demeke nêzik devî û teraşên cure cure lê bêne daçikandin.

Piştî sehbêrîya vê derê Mizrakli berê xwe da cadeyên Leyla Qasim, Azadî û Talaytepeyê. Der barê xebatên van deran de Mizrakli agahî ji karbidestan wergirt û bo keda wan destxweşîya karkeran kir. Mizrakli bal kişand ku piştî dar û devî li van rêya hatin danîn dê rewş û xemla vê derê jî biguhere.

Mizrakli piştre berê xwe da navçeya Baglarê û sehêtîya cadeyên Evrim Alataş, Şengal, Ahmet Kaya, Hashawar, Haskêf û Siwêregê kir û xwest li refûjên van cadeyan catir û pûng bên çandin. Mizrakli der barê dar û devîyan de bi xebatkaran re şêwirî û got, pêwist e dar ji derve neyêne kirrîn, çêtir e em piştgiriya hilberînerên xwecihî bikin.

Di vê serdan û saxtîya li peyzajan de, li gel Hevşaredar Mizrakli, Hevşaredara Sûrê Fîlîz Buluttekin û endamên meclisa şaredariyê jî amade bûn.