Hemşaredarê Şaredarîya Amedî ya Şaristanê Girdî Serra Bucak û Dogan Hatun çarçewaya xebata hişmendîya komelkî de Park Ormanî de şarî reyde ameyî têhet û va ke ê seba pawitişê pakîya bajarî, şarî reyde pîya kampanya kenê.

Kampanyaya Pakîya Amedî ke Şaredarîya Şaristanê Girdî 5ê Heziranî ra nat daybî destpêkerdene, bi sloganê "Ma parkan de goşdarîya şarê xo kenê, ma Amedî ra hes kenê, ma lêmin nêkenê" xebata hişmendîya komelkî, Park 75ê Kayapinarî, Parka Koşuyoluyê Baglarî û Baxçeyê Milletî yê Sûrî ra dima Park Ormanî de dewam kerd. Xebata hişmendîya ke bi pêşengîya Hemşaredaranê Şaredarîya Şaristanê Girdî Serra Bucak û Dogan Hatunî virazîya, tede Hemşaredarê Şaredarîya Kayapinarî Berîvan Gulşen Sîncar û Cengîz Dundar, serekê daîreyan û endamê meclîsî zî beşdar bîy.

Şarî rê torbeyê çopî ameyî vilakerdene

Hemşaredarî ke bi di grûban parkî ra fetelîyayî, şarê ke parkî de bî, înan reyde qisey kerd, waştişê înan goşdarîtî. Hemşaredaran waştî ke park pak bêro pawitene û şarî rê torbeyê êopî vila kerdî û parkî de qadanê basketbol û tenîsî kontrol kerdî.

Waştişê tamîr û pakîye

Şarî ke derheqê xizmetanê sosyalî yê şaredarîye de keyweşîya xo îfade kerd, waşt ke problemê sey dermankerdiş, bêçarebîyayîşê madeyan û pakîye bêrê safîkerdene. Şarî waşt ke tamîr û pakîya parke bêro kerdene.

Hemşaredarî: Ma parkan de şarî reyde yenê têhet

Hemşaredarî ke şarî ra waşt ke derheqê pakîye de hîna zaf baldarî bibo, va ke înan bi Şaredarîya Şaristanê Girdî û şaredarîyanê qezayan reyde kampanyaya pakîye daya destpêkerdene û her roje yew parkede gêrayîşê şarî kenê. Hemşaredaran qeyd kerd ke înan seba pawitişê pakîya bajarî, şarî reyde pîya kampanya kerda û îfade kerd ke weçînayîşî ra nat derheqê pawitişê pakîya derûdorî de xebatî kerdî.

'Ma bajarê xo ra hes kenê û lêmin nêkenê

Hemşaredaran dîyar kerd ke do tamîr û pakîya Park Ormanî bikerê û va ke do ciwanan bipawê û piştgirî bidê înan. Hemşaredaran va: "Ma bajarê xo de pîya ciwîyenê. Ganî ma pîya bajarê xo pak bikerê û problemanê xo zî pîya safî bikerê. No bajar bajarê heskerdişî û vîrî yo, ma bajarê xo ra hes kenê û lêmin nêkenê."