Nûnerên partiyên siyasî yên kurdî ku di hilbijartina xwecihî de tifaq gel HDPê kirin, ligel parlamenterên HDPê Musa Farisogullari û Îmam Taşçier serdana Hevserokê Şaredariya Bajarê Mezin a Amedê Adnan Selçûk Mizrakli kir û daxwaza serkeftinê lê kir.

Di Hilbijartina Xwecihî ya 31ê Adarê de Partiya Gelan a Demokratîk (HDP) ligel partiyên siyasî yên kurdî tifaqa kurdî damezirand. Di nav tifaqê de Platforma Demokratên Kurdistan (PDK) Tevgera Azadî, Partiya Mirov û Azadiyê, Partiya Komînist a Kurdistan (KKP), Partiya Demokrat a Kurdistana Tirkiyeyê (KDP-T) û Komela Kurdên Demokrat û Şoreşger cih digirin, nûnerên van partiyan serdana Hevşaredar Adnan Selçûk Mizrakli kir.

“Em ê bi hev re pirsgirêkan hel bikin”

Di serdanê de çapemenî jî amade bû, Mizrakli mêvanên xwe li ber deriyê protokolê pêşwazî kirin û got, “Ew ne siyasî ne jî civakî şaredariyê wek şaredariyeke bûrokratîk nabînin, bo wan şaredarî mala gel e.” Mizrakli, bal kişand ser giringiya bicihbûna demokrasiya civakî û got ku bi yekgirtinê ew ê hemû pirsgirêkan bi hev re çareser bikin. Mizrakli bal kişand ser dema borî, bi bîr xist ku piştî pêvajoyeke giran û ezmûneke tal hatina vê qonaxê gelek zehmetiyên wê hene û got ku divê ev ne bi ser takekesî bi ser civakî bête nirxandin û em jî wek xizmetkarên vê heyamê, bi hev re xwe didin ber vî barê giran û em ê bi hev re pirsgirêkan çareser bikin.

Em rê nadin îsrafê

Hevşaredar Mizrakli diyar kir ku roja hatine ser wezîfeyê biryara wan e ku ew ê rê nedin îsrafê û çavkaniyên heyî bi gel re bi awayekî wekhev belav bikin. Mizrakli weha got, “Em dikarin aqilê dahêner, enerjî û destkeftiyên wê çawa têkilî vê derê bikin. Li xwecihî kapasîteyeka mezin heye, ligel vê divê em sûdê ji gerdûniyê jî werbigirin. Di serî de konseya bajêr em ê hemû pêkhateyên bajêr têkilî mekanizmaya xwe ya biryaran bikin.”

Mizrakli bal kişand ku piştî ew dîmen bi raya giştî re hatin parvekirin di wijdana civakê de birîneke mezin vebûye û got ku ev bergê rapora qayûman in. Mizrakli diyar kir ku dema pêş ew ê belgeyan bi her kesê re parve bikin û wêrankariya vê heyamê derxin pêş. Mizrakli aşkere kir ku ev berpirsyariyeke wijdanî, exlaqî û civakî ye. Mizrakli amaje pê kir ku divê xwe di raboriyê de asê nekin û dema pêş jî li gorî hêvî û daxwazên gelê xwe divê şaredartiyeke tevlêker, civakî û demokratîk ava bikin. lMizrakli xwest ku pêşniyaz jê re bêne kirin û ev serdan û çavpêketin bilind û nirxdar bi nav kirin.

Piştî Mizrakli parlamentere HDPê Îmam Taşçier axivî û got ku div ê hilbijartinê de tifaqa kurd xebateke baş û serkeftî meşandiye. Taşçiser bal kişand ku bi hev re bi ser ketine, xurt bûne û got, “Giring e ev tifaq di dema pêş de dewam bike. Divê ev tifaq bêt xurtkirin û bibe tifaqeke mayinde. Ji bo bajêr û herêma xwe em ê destê xwe bidine hev û pêkve xebatê bikin.”

Serokê Giştî yê PDK-Tê Mehmet Emin Kardaş jî bi bîr xist ku yek ji armanca tifaqê ew bû ku dawî li qayûman bînin û heqê gel dîsa bidin destê wî. Kardaş weha got, “Me tifaqa hilbijartinê kir, em bi ser ketin. Niha bo serkeftinên mezintir di bin banê heman tifaqê de em ê berdewam bin. Gelê me bi salan e li benda yekitiya neteweyî bû. Divê ev yekitî bidome. Bi ya min, divê kesên derî tifaqê mane jî daxilî tifaqê bêne kirin û tifaq çend berfireh be û bajarê me, bo herêma me dê baştir be.”

Serokê Giştî yê OSPê Sinan Çiftyurek jî bal kişand ser tifaqê ku rola wê di pêkanîna demokrasiya navxweyî de çiqasî giring e û got, “Divê bi gel re biryar bêne girtin û gel daxilî biryarên rêvebirinê bêne kirin. Divê bi gel re biryar bên girtin û bi gel re ew biryar bên dabînkirin.”