Şaredarîya Bajarê Gird a Amedî semedê gedeyanê mabenê serra 7-14ê tehtîlê hamnanî henî weş bivîyarnê pê slogana “Ma bajarê vîr û heskerdîşî de newe ra benê hêzdar “ Mektebanê Sporî Hamnanî 1ê Temmuze de akeno.

Serekîya Dayîreyê Xizmetanê Ciwan û Sporî ya Şaredarîya Bajarê Gird a Amedî semedê kê gedeyan tehtîlê hamnanî weş bivîyarnê pê slogana “Ma bajarê vîr û heskerdîşî de newe ra benê hêzdar” Mektebanê Sporî ya Hamnanî akeno.Qeydê Mektebanê Sporî ya Hamnanî hetanî 24ê Hezîrane dewom keno û Serekîya Dayîreyê Xizmetanê Ciwan û Sporî ya Sumerparqe de yeno viraştene.

Serekê Dayîreyê Xizmetanê Ciwan û Sporî ya Şaredarîya Girdî Mahmut Evînç derheqê Mektebanê Sporî ya Hamnanî de zanayîş da û wîna va:”Ma semedê kê gedeyan tehtîlê hamnanî weş bivîyarnê û ma gedeyan teşwîkê sporî bikeme qeydê Mektebanê Sporî ya Hamnanî da dest pêkerdiş.Qursanê kê pê slogana “Ma bajarê vîr û heskerdîşî de newe ra benê hêzdar”abibo,qursên tenîsa masayî,fitbol,satranç,karete,bîlîm û teknolojî,kayên zeka û mezgeyî,nuştoxî û afirnayîşî,matematîko keyfin,wendîşo lezgîn,fealîyetê geyrayişî û muzîkî pêroyî de 16 branşan de qurs estê.”

Evînç aşkera kerd kê mabenê gedeyanê serra 7-14 rê perwerde Cuya Muşterek a Sumerparqe,Tesîsê Sporî ya Talaytepe,Hewze Seyrantepe TOKÎ û Banê Zanayîşî de bêrê dayene.Evînç kîfş kerd kê perwerdeyan gore zêdeyîna branşan mabenê hewte û pêynîya hewte de bêrê viraştene.

Şaredarîya Bajarê Gird a Amedî gedeyanê kê beşdarê qursan benê rê malzemeyê sporî vila bikero û gedeyan rê wesayîtê bê pere zî bêro dayene.Evînç veng da kê gedeyan bêrê û qeydê xo bivirazê.