Meclîsê Şaredarîya Bajarê Girdî ya Amedî, pêşnîyazê ke rojnamegerî wexto ke dima xeberan gêrenê resê komkî ra bêheq îstîfade bikerê, bi yewvengîye qebul kerd û seba ke rêxistinanê çapemenî reyde protokol bêro viraştene heq da Hemşaredaran.

Meclîsê Şaredarîya Bajarê Girdî ya Amedî, roniştişê hîrêyine yê kombîyayîşo asayî yê aşma êlule bi serekîya Hemşaredar Dogan Hatunî viraşt. Kombîyayîşo ke Salona Meclîsê Şaredarîya Bajarê Girdî de virazîya, endamê meclîsî beşdar bîy.

Meclîs de maddeya rojeve ya seba rojnamegeranê ke bajar de xebetînê, ame qiseykerdene. Pêşnîyazê Serekîya Daîreya Çapemenî, Weşanî û Têkilîyanê Şarî ke seba ke rojnamegerê ke sînorê bajarê Amedî de çapemenîya netewe û herêmî de xebetînê, rehet bieşkê xeberan dima bigêrê, wasiteyanê resê komkî yê ke binê Şaredarîya Bajarê Girdî de yê, bêheq bixebitnê û derheqê naye de seba ke rêxistinanê çapemenî reyde protokol bêro viraştene heq bêro dayene Hemşaredaran, ame reyîdayîş.

Meclîsî pêşnîyazo ke do raştameyîşê rojnamegeran rê hetkarî biko, bi yewvengîye qebul kerd.