Hemşaredarê Şaredarîya Amedî ya Şaristanê Girdî Serra Bucak û Dogan Hatun, Taxa Azîzîye ya Yenîşehîrî de keyeyî zîyaret kerdî û waştişê şarî, şarî ra goşdarî kerdî.

Hemşaredarê Şaredarîya Şaristanê Girdî Serra Bucak û Dogan Hatun, Qezaya Yenîşehîrî de Taxa Azîzîye de ke tede zafane keyeyê kêmîameyeyî ciwîyenê, bêxebere şîyî keyeyan. Zîyaretî de Hemşaredarê Şaredarîya Yenîşehîrî Mehmet Ergun, serekê daîreyan û endamê meclîsî zî pîya bî.

Şar ke verê keyeyanê xo de hemşaredarî dîyî, ecêb mendî

Hemşaredarî, yew bi yew verê keyeyan de berî kutî û Taxa Azîzîye ra gêrayî. Şarê ke hemşaredarî verê keyeyanê xo de dîyî, ecêb mendî û keyf û memnûnîya xo ard ziwan. Şarî va ke 8 serrî yo kes nêameyo taxe û verê keyeyanê înan, û seba eleqeya înan ra hemşaredaran rê sipas kerd.

Seba çareserîye beşî ameyî wezîfedarkerdene

Şarî waştişê xo hemşaredaran rê vatî: roşnayîşê kuçeyan, rayîr û kanalîzasyon, hetkarîya sosyale û viraştiş û tamîrê keyeyanê înan ê ke erdlerzî ra zerar dîyo.

Hemşaredarî şarî reyde qisey kerd, waştişê înan not girewt û seba çareserîye beşê eleqedarî wezîfedar kerdî.

Hemşaredare Bucak, viraştişê bastêxî de hetkarî kerd

Hemşaredara Bucak, keyeyêk de ke bastêx viraştêne zî bîye mêman. Hemşaredare Bucak keye rê hetkarî kerd û derheqê viraştişê bastêxî de cinîyan reyde qisey kerd.