Şaredarîya Amedî ya Şaristanê Girdî seba ke şarê ma bi hewayêko weşîye dest bi roje bikero, mîyanê şaristanî de 5 cayan ra aktîvîteyanê sporê serê sibayî organîze kena.

Aktîvîteya sporî ke şaredarî organîze kena, 5 cayanê şaristanî de hetê perwerdekaranê pisporan ra binê banê Serekîya Daîreya Xizmetanê Ciwan û Sporî de yeno kerdene.

5 cayan de her serê sibayî spor

Aktîvîteyo ke Anitpark, Parka Koşuyolu, Parka Hewt Birayan, Tema Park û Marka Mîletî de yeno organîzekerdene, serê sibayî mabênê saetan 06.30 û 09.00î de yeno kerdene. Bi rehberîya perwerdekaranê pisporan program do heme serre dewam bikero.

Şar memnun o: Weşîye û sosyalîye pîya yê

Şaro ke beşdarê sporî beno, îfade kerd ke ê pê nê sporan hem weşîya xo pawenê hem zî embazanê bînan reyde yenê têhet û sosyal benê. Beşdaran ra Makbule Tokdemîrlî îfade kerd ke aye verê problemê weşîye dîyî û wina va; “Ez keye de bîya, nêweş bîya. Ma nika yenê tîya, perwerdeyêko zaf weş yeno dayene. Ma memnun ê. Ez seba spor û weşîya xo yena.”

Beşdarêka bîne Şukrîye Oyur zî dîyar kerd ke a bi pêşnîyazê doktorî yena tîya û va “Eke spor nêbo ez nêeşkena payra vindera. Doktorî mi ra vatbî ganî ti her roje rayîr û şêra. Nêweşîya min a zerrî, tansîyon û helîyayîşê kateyan est a. Ez saya nê programî xo rê spor kena.

Cuya sosyale ke sporî reyde awan bena

Roza Bagca ke îfade kerd ke a bi serran o ke rayîr şina û xeylê xeyrê ey dîyo, va, “Spor tena seba weşîya ma fîzîkî ney seba sosyal û psîkolojîke zî rind o. Ma embazanê tîyayî reyde sohbet kenê terreqnenê, wextêko weş vîyarnanê. Perwedekara ma zî zaf baş a, ma tira memnun ê.”